مسرحية بالهجة المصرية الريفية
كما تدين تُدان
مشهد ( 1 )
بهية:- يا ورور يا فجل..يالا الجرجير الطازة "يمر الناس ويشترون منها"
سنية:- معلمتيش يا بهية؟
بهية:- معلمتش بأيه ياختى؟
سنية:- قال ايه بيقولوا ان العمدة بيشترى اراضى من الفلاحين ...وفين بقا؟!!! نواحى الارض بتاحتك.... شرق البلد يعنى..
بهية:- وهو هيعمل ايه ياختى بالارضى دى ؟!! تلاقيها اشاعات..
سنية:- لا وحياة دى النعمة.. دا حتى عبد الرازق وعليوه جيرانك فى الارض باعوله امبارح..
بهية:- يالهوى عليوه باع ارضه ؟!! ازاى؟!! وهياكل منين هو وعياله؟؟
سنية:- ياختى يحط الفلوس فى مشروع ولا حاجة
بهية:- يادى الخيبة يا ولاد على الرجالة .... يبيع ارضه !!! دى عرضه!
سنية:- الفلوس زغللت عينيهم ياختى والعمدة مصمم على الاراضى دى
بهية:- اشمعنى بقا عليها ريشه ولا عليها ريشه
سنية:- لا ياختى بيقولوا ان فى كوبرى كبير قوى قوى هيعدى ريحها وهتبقى بالشئ الفلانى..
بهية:- استرها يارب علينا... خلينا فى شغلنا واكل عيشنا.... يا فجل ياورور... الجرجير الطازة
مشهد ( 2 )
العمدة:- يا شيخ الخفر......انت يا شيخ الخفر
شيخ الخفر:- نعمين يا عمدة.... الامن مستتب
العمدة:- أمن ايه يا خويا.... انت كنت نايم ولا أيه؟!!
شيخ الخفر:- أنى لا ياحضرة العمدة دانى عينى مفنجلة اهيه
العمدة:- طيب يا خويا.... ها ...اشتريت كل الاراضى الى فى شرق البلد
شيخ الخفر:- كله تمام ياحضرة العمدة... اشترناهم كليتهم............(يتهته) بس.....بس.......بس......(يقاطعه العمده)
العمدة:- بس ايه يا اخر صبرى .... انتطق
شيخ الخفر:-مانى هقول اهوه... فاضل البت بهيه مش عايزة تبيع...
العمدة:- ايه؟! مش عايزه ايه؟ ليه؟! هى ليها رأى بعد رأيى ولا ايه....غور جرجرها وهاتها هنا بياعة الفجل دى
شيخ الخفر:- اوامرك يا حضرة العمده
العمدة:- "يحدث نفسه" اه يا بلد مالكيش ظابط ولا رابط
يدخل شيخ الخفر ومعاه بهية
شيخ الخفر:- ادخلى ياختى...ادخلى
بهية:- العوافى ياحضرة العمدة
العمدة:- لالا لا..لا سلام ولا كلام ..انت مخديش الفلوس ليه يابت ومضيتى على العقد بتاع الارض
بهية:- عقد ؟! عقد ايه وارض ايه يا عمده؟؟؟!!
العمدة:- هتستهبلى يا بت عليا عقد بيع ارضك ياختى
بهية:- ياحستى وآكل منين انا وعيالى دا الارض دى هى رزقى انا وهما بعد موت ابوهم..دى هيه الراجل الى بتسند عليه
العمدة:- هو انا هاخدها منك ببلاش ياختى؟
بهية:- الفلوس بتخلص ياحضرة العمدة ....والارض تدى ولا تخلصشى
العمدة:- اممممم طيب..طيب..طيب.. هزودك شويه عن الفلاحين.. عشان تبقى مبسوطة
بهية:-يعنى يرضيك ياعمدة ابيع ارضى واقعد كدا عريانه
العمدة:- انت منشفة مخك ليه يلا غورى.. وهتبيعى غصب عنك
شيخ الخفر:- كدا زعلتى العمدة منك يا بهية يالا امضى ع العقد وخدى فلوسك...زى باقى الفلاحين وريحى نفسك من الوش ديه
بهية:-ابيع رزقى ياناس... وديه يرضى مين بس؟!!
شيخ الخفر:- انا نصحتك.........العمدة راجل مفترى ومش هيسيبك فى حالك
بهية:-ربنا اقوى من الكل .. وعيالى يتامى وليهم رب اسمه الكريم ليهم رب اسمه الكريم
مشهد ( 3 )
تدخل بهية على العمدة
بهية:- الحقنى يا حضرة العمدة الحقنى
العمدة:- فى ايه يا بت .. ما فيش احم ولا دستور انتى داخلة على زريبة؟!
بهية:- زرعتى...زرعتى ياعمدة..زرعتى ضاعت
العمدة:- وانى هعملك ايه يا ختى
بهية:- غرقوها ولاد الحرام بالليل...اكل منين يا ناس ..عيالى يأكلوا منين...ضاع تعبى
العمدة:- بقولك ايه يابت مش ناقص ندب وعويل... جايز ناسيتى تقفلى المسقى ولا حاجة.
بهية:- يا خراب بيتى.. انت فلاح وعارف..هى دى حاجة تتنسى..وبعدين الارض انى سقيتها من زمان ..حد فتح عليا المسقى الله يخرب بيته زى ماخرب بيتى
العمدة:- اخرسى يابت متدعيش على حد...قدامى
بهية:- وانت مالك ياعمدة بولاد الحرام دول
العمدة:- داخلى ايه؟!!! إلا داخلى... انا ما بحبش الغيبة فى حضورى ..حرام يابت
بهية:- حقى ياعمدة... اتخرب بيتى..هجيب محصول منين ابيعه واكل عيالى..تعبى ضاع ياناس
العمدة:- طيب طيب...انى ممكن اشتريها منك ويبقى معاكى فلوس.. وهدفع كمان تمن الزرعة عشان اليتامى دول بس
بهية:- يادى الخراب المستعجل.... عمرى ما ابيع ارضى ابدا
العمدة:- غورى فى داهيه وإحنا هنبقى نحقق...يلا
بهية:- حسبى الله ونعم الوكيل... الله يخرب بيت الظلمة ..حقى وحق عيالى عندك يارب
العمدة:- تك البلاوى..لسانها زارف... بتدعى عليا ليه..انى غرقت ارضها عشان عاوز مصلحتها...هو انى يهمنى غير مصلحة البلد
مشهد ( 4 )
بهية:- آآآه..ياخراب بيتى..... هأكل العيال منين يارب
عالية:- ياحستى...مالك يا بهية ..قاعدة كدا ليه ياختى؟؟!!
بهية:- ارضى غرقت ياعالية...زرعتى راحت
عالية:- ياخرابى عملها المفترى ...عملها فيكى المؤذى
بهية:-هوه مين ديه؟! قوليلى
عالية:- إيهه ..يعنى متعرفيش ؟!!!
بهية:- والنعمة ما أعرف..قوليلى عليه ودلينى عشان اشتكيه للعمدة يجيبلى حقى.....
عاليه:- ياخيبتك..ياخيبتك.. العمدة يا عبيطة الى هتشتكيله ديه.. هو الى غرقهالك
بهية:- يالهوى... يالهوى ..انت بتقولى ايه؟!
عالية:- بقولك الى بيحصل مع كل الى بيرفض يبيع ارضه
بهية:- ياخرب بيتك يا بهية... منه لله المفترى...حسبى الله ونعم الوكيل...حقى وحق عيالى عندك يارب ..حق اليتامى عندك يارب
مشهد ( 5 )
شيخ الخفر:- الحق يا عمدة... الحق ياعمدة...الحق
العمدة:- فيه ايه يا واد...جيبتلى شلل الاطفال
شيخ الخفر:- النار النار ولعت فى ارضك كلتها...ودخلت ع البهايم وخلصت عليهم
العمدة:- يا وقعة مطينة بطين ... ياخراب بيتك ياعمدة.. يا خراب بيتك ياعمدة
شيخ الخفر:- هو خراب بس.... دا خراب مستعجل...النار مسبتشى ولا فتفوته
العمدة:- ياخراب بيتك يا عمدة يا خراب بيتك يا عمدة
شيخ الخفر:-الخفير كان بيعمل شاى..ونسى الحطب والع..وحصل الى حصل
العمدة:- يا خراب بيتك يا عمدة يا خراب بيتك يا عمدة
شيخ الخفر:- واهل البلد كانوا نفسهم يساعدوا ويطفوا النار ....بس وقفوا وقالوا الله اكبر الله اكبر...يا منتقم من كل جبار يارب
العمدة:- يا خراب بيتك يا عمدة يا خراب بيتك يا عمدة
شيخ الخفر:- والبت بهيه واقفت وقالت دا حقى وحق عيالى اليتامى الحمد والشكر ليك يارب
العمدة:- يا خراب بيتك يا عمدة يا خراب بيتك يا عمدة
شيخ الخفر:- والناس الى اشتريت ارضهم راحو للمأمور واشتكوك كليتهم انك اخدت ارضهم بالاجبار...والمأمور هيجى يحقق معاك وهتبقى ليلة
العمدة:- يا خراب بيتك يا عمدة يا خراب بيتك يا عمدة
شيخ الخفر:-ياسلام يا حضرة العمدة..المصايب نازلة ترف عليك زى المطر
العمدة:- انت شمتان ياواد..........يا خراب بيتك يا عمدة يا خراب بيتك يا عمدة
شيخ الخفر:-اهيه...لا شماته ولا حاجة......بس دا خراب مستعجل
العمدة:- يا خراب بيتك يا عمدة يا خراب بيتك يا عمدة
شيخ الخفر:- هتعمل ايه ياعمدة فى البلاوى ديه
العمدة:- هعمل ايه...هعمل ايه؟!!!.....هوه فى حاجة تنعمل يا خراب بيتك يا عمدة يا خراب بيتك يا عمدة
بهية:- يامن انت كريم يارب...لا ممكن يضيع حق مظلوم ابداً
العمدة:- انت جايه تشمتى فيا ....يا بت
بهية:- انى؟! معاذ الله انى غلبانه ومؤمنة ومعرفش الشماته يا عمدة...بس عارفة ان حق المظلوم ميضيعشى ابدا
العمدة:- ايوه يا بت ..عندك حق انا افتريت كتيير..جمع المال عمانى
بهية:- الفلوس بتروح وتيجى...لكن رضى الله وراحة البال ميتقلوش بمال ابدا
العمدة:- آآآآآه يانى يا خراب بيتك يا عمدة يا خراب بيتك يا عمدة
بهية:- لا حوله ولا قوة الا بالله.....ربنا يغفرلك اعمالك
العمدة:- يا خراب بيتك يا عمدة يا خراب بيتك يا عمدة
بهية:- استرها معانا يارب ... استرها معانا يارب
العمدة:- يا خراب بيتك يا عمدة يا خراب بيتك يا عمدة يا خراب بيتك يا عمدة يا خراب بيتك يا عمدة
انتهى
الرئيسية 
